Sunday, May 29, 2011

ഭരണ ചക്രം


ക്ര്ര്‍ര്‍ര്‍ര്‍ര്‍ര്‍ .... ക്ര്ര്‍ര്‍ര്‍ര്‍ര്‍ര്‍ ....

ഭരണ ചക്രം അനങ്ങുന്നില്ല . എന്ത് ചെയ്യും ? ഇത് തിരിയാതെ എങ്ങനെ കാര്യങ്ങള്‍ നടക്കും ?

കപ്പിത്താന്‍മാര്‍ എല്ലാരും ചേര്‍ന്ന് ആഞ്ഞു ശ്രമിച്ചു .

അനങ്ങുന്നില്ല . 

ലോകോത്തര മെക്കാനിക്കുകള്‍ വന്നു നോക്കി . യോഗം ചേര്‍ന്നു . ചര്‍ച്ച ചെയ്തു ...

കവടി നിരത്തി . പ്രശ്നം വച്ചു .

" ജനങ്ങളുടെ കണ്ണീരും വിയര്‍പ്പും രക്തവും വീണ് ചക്രം പ്രവര്‍ത്തന രഹിതമായതാണ് !! . ഭാരതാംബ ക്ഷോഭിച്ചിരിക്കുന്നു "

"ശ്ശോ ... !!! "

" അന്ന് മുതല്‍ ഇന്ന് വരെ ഭരണ ചക്രം തിരിച്ചു കൊണ്ടിരുന്ന എല്ലാവരും ഇന്ധനത്തിന് പകരം ഉപയോഗിച്ചത് ജനങ്ങളുടെ കണ്ണീരും വിയര്‍പ്പും രക്തവും ആണ് . ഇനി അത് മാറണം . ജനങ്ങളുടെ സമാധാനവും സന്തോഷവും സുഖവും ആയിരിക്കണം ഇനി മേല്‍ ഭരണ ചക്രത്തിനുള്ള ഇന്ധനം . "

" ശരി . അങ്ങനെ തന്നെ !! " 

ഇന്ധനം തീര്‍ന്നു തുടങ്ങിയപ്പോള്‍ ജനങ്ങളുടെ രക്തത്തിനു പകരം ഭാരതത്തിന്‍റെ രക്തമൂറ്റി നേതാക്കള്‍ ഭരണ ചക്രം തിരിച്ചു .